තරහද මන්දා | Tharahada Manda - Kaveesha Sarangi

ඇය කවීශා සාරංගි. මා තනිවෙලා කියන ගීතයත් සමග ගායන ලෝකයට පිවිසෙන ඇය මේ වන විට ගීත හතරක් රසිකයන්ට දායද කොට තිබෙනවා.තවමත් සෞන්දර්ය විශ්වවිද්‍යාලයේ සිසුවියක් වන කවීශා මේ වන විට ඇයගේ අලුත්ම ගීත තරහද මන්දා නමින් රසිකයන්ට ඉදිරිපත් කර තිබෙනවා. ඉතින් රූ රේඩියෝ අපි කල්පනා කළා ඇයගෙන් අලුත් විස්තර සොයා බැලීමක් කරන්න. ඒ වගේම ඔයාලාට පුළුවන් ඇයගේ ගීතහතරම අපගේ රේඩියෝවෙන් රස විඳින්න. මේ ඇයගේ කතාව ඇයගේම වචනවලින්.......

මම කවීශා සාරංගි. මගේ ගායන ජීවිතයේ ආරම්භය පටන් ගන්නේ "මා තනිවෙලා" කියන ගීතයෙන්. එය මාගේ යහළුවෙක් වන නලීන් ජයවර්ධන සමග ගායනා කළේ. එහි සංගීතයද ඔහුයි. පද සජිත් චතුරංග මල්ලිගෙන්. ඉන් පසු මම ගීත 2ක් කලා නවරත්න ගමගේ මහත්මයාගේ සංගීත සංයෝජනයත් සමග. එහි "ඔබ ඈගෙ වීලා" ගීතයෙ පද සජිත් මල්ලි ගෙනුත් "අත්තටු මාගේ නැත වැඩිලා" යන ගීතය ලෙස්ලි රත්නසිරි හෙවත් මගේ පියාණන්ගේ පද සංකල්පනාවක් වුණා. මගේ මුල් ගුරුවරයා වන්නේ විශාරද දමයන්ති ජයසූරිය මහත්මියයි. ඇයගේ සහය මට නිබඳවම ලැබෙනවා. 

"මගෙ පාසල මොරටුව වේල්ස් කුමරි විදුහල. එහි රමණි ප්‍රනාන්දු ගුරුතුමිය ( බටහිර සංගීත ) හා හිටපු රාණි ෆොන්සේකා ආදරණිය ගුරුමෑණියන් මම මගෙ සංගීත ජීවිතයේදී බෙහෙවින්ම සිහිපත් කල යුතු චරිත දෙකක්. ඒ වගේම මගේ ආදරණීය ගුරුවරු දෙදෙනා වන අමරසිරි මුණසිංහ ගුරුතුමා සහ නන්දසේන කටුවාවල ගුරුතුමාවත් බොහෝ සෙයින් සිහිපත් කල යුතුයි. මෙම ගුරුවරු සියලු දෙනා මගේ සංගීත ජීවිතයේ දැවැන්ත චරිතයි. "

එම ගීත 3න් පසුව මෑතකදී "තරහද මන්දා" යන ගීතය නිමේශ් චාමික අයියාගේ සංගීත සංයෝජනයත් සමඟ කලා. එහි පද සඳුන් පෙරේරා මල්ලීගෙන්. නිමේශ් අයියා ගැනත් සිහිපත් කල යුතුයි මගේ සංගීත ජීවිතයේදී. ඔහුත් මගේ ගුරුවරයෙක් වන නිසා. මේ දවස්වල "තරහද මන්දා" යන ගීතයේ රූප රචනාවට ලැහැස්ති වෙන ගමන් සහ පාඩම් වැඩ කටයුතුත් සමග කාලය ගත කරනවා. 

මම සෞන්දර්ය විශ්ව විද්‍යාල සිසුවියක්. එහි යහළු යෙහෙලියන්ගෙන් ලැබෙන සහයත් උපරිමයි. 

අනාගතයේ ඇති එකම බලාපොරොත්තුව කාටත් කරදරයක් නොවී සතුටින් සංගීතයත් සමගම කාලය ගත කරන්න සහ හොඳ නිර්මාණ රැසක් එළි දැක්වීමට..

මා තනිවෙලා
ඔබ ඇගේ වීලා
අත්තටු මගේ නැත වැඩිලා
තරහද මන්දා